"I ha scho wieder Pouletschänku gchouft, wüui
nid weiss, wasi söu choche!“
So chas ja nid wytergah! Di Ofe chotzt das
Züg äuä ds nächscht mau wider use, wüu er sech längwilet! (A propos Ofe: Hesch
dä scho mau putzt oder gseht er so us wie dr Dampfabzug…?) Zudäm issisch eh viu
z viu Fleisch u das isch ungsung, unökologisch und vor auem längwilig. Drum bechunnsch hie
äuä mehrheitlech Vegi-Tipps. Uf dr rächte Site gsehsch, wie das Ding hie
funktioniert!
U we de meh aus 2 Portione chochsch (eini für grad u eini für speter :-)), de lad no mi derzue
y, oder öpper angers. Wo nätt isch und’s schetzt und dr es Lob usteilt, wüu
choche macht nume würklech Spass, we me weiss, dass das fein isch, wo me
chocht! U Ässe fägt i de meischte Fäu o meh i Gseuschaft. Mängisch düe d Gescht
eim sogar abwäsche…
Äbe. U wenni mau
nid sött reagiere oder säuber ratlos bi, de luegsch eifach die Site hie düre
und machsch das, wo di am beschte het dünkt.
I hoffe, das
Projekt hout häre. ;-) Trou di ab und zue öppis z choufe, wo de nid kennsch
oder nid weisch, wie’s geit, z.B. es Gmües oder es Getreide oder so... I hiufe
dr ja!
So, itz blybt mer
no, dir e schöne Tag mit und aus Päckli z wünsche und: Schnyd di nid!
AK
Keine Kommentare:
Kommentar veröffentlichen